بالاں نوں پوٹی کرنا سکھاؤن بارے رہنمائی
آپنے بال نوں پوٹی کرنا کدوں تے کیویں سکھاؤنا اے، اس بارے سرکاری مدد نال، نویں رہنمائی
پوٹی کرنا سکھنا تہاڈے بال دے وڈے ہون وچ اک اہم پڑاء ہوندا اے۔ اسیں سمجھدے آں بئی سارے بال آپنے حساب نال وادھے پئے ہوندے نیں، پر کھوج دسدی اے بئی 18 تے 30 مہینیاں دے وچکار پوتڑے، کچھیاں اتے پوٹی کرنا سکھاؤن والیاں پینٹاں سنے، پوتڑیاں دی ورتوں روک دینا تہاڈے بال دیاں آندراں تے مثانے دی صحت لئی سب توں ودھیا اے۔
ایہہ بہت ای اہم اے بئی سکول وچ ریسپشن دا سال شروع ہون توں واہوا چر پہلاں بال پوتڑے ورتنا چھڈ دین۔ چھڑا اوہناں بالاں نوں ایہدے توں باہر رکھیا جانا چاہیدا اے جیہناں لئی وادھو لوڑاں دی تشخیص ہوئی ہووے، جیویں کہ مثانے یاں آندراں دے روگ۔
پوتڑے ورتنا چھڈنا چھڑا بالاں نوں پُراعتماد، صحت مند اتے ڈھانی دا انگ محسوس کرواؤن وچ ای مدد نہیں کردا، سگوں ایہدا مطلب ایہہ وی ہوندا اے بئی استاد پڑھاؤن اتے دوجے طریقیاں نال بالاں دے ودھن پھُلن وچ ہتھ ونڈاؤن وچ بہتا ویلا لنگھا سکدے نیں۔
کیہ تہانوں پتہ سی؟
باہمی تعاون نال بنایا گیا منجانب
مینوں کیویں پتہ لگے کدوں شروع کرنا اے؟
لگ بھگ سارے بال ٹھیک مدد دے نال صاف اتے سُکا رہنا سکھ سکدے نیں، سنے اوہ بال جیہناں دیاں اُچیچیاں تعلیمی لوڑاں اتے معذوریاں (SEND) ہوندیاں نیں۔ حسی لوڑاں والے بالاں نوں وادھو ویلے اتے مدد دی لوڑ ہو سکدی اے۔
پوٹی کرنا سکھاؤن نوں اک عمل دے طور تے ویکھیا جانا چاہیدا اے اک اکلی واپری دے طور تے نہیں۔ ایہہ ویلے دے نال نال ہوندا اے اتے بال جدوں آپنے آپ بیٹھنا سکھ لین اوہ اک پوٹی یاں ٹوائلٹ تے بیٹھن دی مشق کر سکدے نیں۔
کھوج دسدی اے بئی تہاڈے بال دیاں آندراں اتے مثانے دی صحت لئی سب توں ودھیا گل ایہہ اے بئی اوہ 18 توں 30 مہینیاں دے وچکار پوتڑے بنھنا چھڈ دین۔ جیکر تہاڈے نکے یاں وڈے بال دیاں SEND نیں، تہانوں ٹوائلٹ جانا سکھاؤن نوں اڈیکن دی لوڑ نہیں اے۔
ٹوائلٹ جانا سکھنا ہُنر سکھن دی گل اے، اتے ایہہ وادھو مدد اتے/یاں اک واضح معمول نال سکھایا جا سکدا اے۔ جنا لما چر تُسیں اڈیکو گے، نواں معمول سکھنا اتے پوتڑے بنھے بغیر پُراعتماد محسوس کرنا تہاڈے بال لئی اوناں ای اوکھا ہو سکدا اے۔
کجھ بال ایہہ نشانیاں دکھاؤندے نیں بئی پوتڑے ورتنا چھڈن دا ایہہ ٹھیک ویلا اے۔ مثال دے طور تے، اوہناں نوں پتہ لگ سکدا اے تے اوہ تہانوں دس دیندے نیں بئی اوہناں نوں کدوں پوٹی آ رہی اے تے پوٹیاں وچکار وِتھ کہٹو کہٹ اک گھنٹہ ہووے گی۔ پر بہت سارے بال کُھلیاں نشانیاں نئیں دکھاؤن گے تے بوہتے کدی وی پوتڑے بنھنا روکن لئی نہیں آکھن گے، اچیچا جے اوہ ڈسپوزایبل پوتڑے یاں ایہو جہیاں کچھیاں پاؤندے نیں جیہڑے اوہناں نو سُکا محسوس کرن واسطے ڈیزائن کیتے گئے ہون۔
یقینی بناؤ بئی تہاڈے بال نوں قبض نہیں اے - اوہناں نوں باقاعدگی نال نرم ٹٹی آؤنی چاہیدی اے (کہٹو کہٹ ہر دوجے دن)۔ جے تہاڈے خیال وچ تہاڈے بال نوں قبض ہو سکدی اے، تاں پوتڑے روکن توں پہلاں ایہدے لئی مدد لینا اہم اے۔
کیہ تہانوں پتہ سی؟
تیار ہونا
بہئوں سارے بالاں لئی، پوٹی توں اُکا ای ولا جانا اتے ایہدی تھاں ٹوائلٹ (ڈُھکوِیں سِیٹ، پوڑی تے سہارے دے نال) ورتن ول دھیان دینا فیدےمند اے۔ ایہدے نال چھڑا بال نوں ہگن مُوتن لئی باتھ روم دے ماحول دی عادت ای نہیں پیندی، سگوں ایہہ پوٹی توں ٹوائلٹ جان دی لوڑ نو دور کرکے اک وادھو وچکارلے پڑاء نوں مکاؤن وچ وی مدد کردا اے۔
پر بھاویں پوٹی نال شروع کرنا چُنو یاں سدھا ہگن جاؤ، بہت ساریاں شیواں نیں جیہڑیاں تُسیں آپنے بال نوں پوتڑے بنھنا چھڈن لئی تیار کرن وچ مدد دین لئی کر سکدے او۔ جیویں ای تہاڈا بال بناں آسرے دے بیٹھن لگے تُسیں تیار ہونا شروع کر سکدے او۔
1۔ جیویں ای پوتڑے گلے ہون یاں لبڑن اوہناں نوں بدل دیو
ایہہ تہاڈے بال نوں سکھاؤندا اے بئی صاف ستھرا تے سُکا رہنا صحت مندی اے۔ جے تُسیں کر سکو، تاں پوتڑے نوں باتھ روم وچ بدلو تاں جے اوہناں نوں ایہدا سانگا ہگن مُوتن نال جوڑن وچ مدد ملے۔
2۔ آپنے بال دی جان پچھان پوٹی یاں ٹوائلٹ نال کرواؤ
آپنے بال کول دستیاب پوٹی دیاں کجھ ودھیا کتاباں پڑھ کے، اوہناں دی من بھاؤندی گُڈی یاں کھڈونے نو ایہدے تے 'واری' لین وچ مدد کرکے اتے فیر اوہناں نوں آپ ایہدے تے بیٹھن لئی ہلاشیری دے کے۔
3۔ پوٹی یاں ٹوائلٹ تے باقاعدگی نال بیٹھن دی مشق
اودوں شروع ہو سکدی اے جدوں اوہناں دی پوٹی یاں ٹوائلٹ نال جان پچھان کروا دتی گئی ہووے، دن وچ کئی واری کردیاں ہوئیاں۔
4۔ صحت مند کھان پین نوں ہلاشیری دیو
آپنے بال نوں ریشے دار شیواں کھان نوں دیو (جیویں سبزیاں اتے براؤن بریڈ) تاں جے قبض توں بچاء ہووے، جیہڑی پوٹی کرنا سکھاؤن نوں اوکھا بنا سکدی اے۔
5۔ واہوا سارا پانی پیو
پورے دن وچ ونڈے ہوئے ویلیاں تے 6 توں 8 واری پینا۔ جدوں ٹھوس شیواں کھواؤنا شروع کرو، تاں پانی کپ وچ دیو۔
ایہہ سانجھی کوشش اے
جیکر تہاڈا بال پہلاں ای نرسری وچ، پری سکول وچ، اک بال کھڈاوی کول اے یاں باقاعدگی نال دادے دادی، یاراں دوستاں یاں ٹبر دے دوجے جیاں ولوں سانبھیا جاندا اے، تے اوہناں نال گل کرو تے وچار وٹاندرہ کرو بئی تُسیں آپنے بال نوں پوٹی کرنا سکھاؤن دے پینڈے وچ مدد کرن لئی رل کے کیویں کم کرو گے۔
اوہناں شیواں تے اتفاق کرو جیہڑیاں تُسیں سارے رل کے کرو گے اتے اوہناں نوں آکھو بئی تہاڈی تے تہاڈے بال دی مدد کرن۔ واہوا سارے وادھو کپڑے دیو اتے اوہناں نوں کسے وی ایہو جہی نشانی بارے دسو جیہڑی تُسیں ویکھی اے جیہڑی دسدی اے بئی تہاڈے بال نوں پوٹی یاں ٹوائلٹ ورتن دی لوڑ ہو سکدی اے۔ ایہہ مستقل مزاجی تہاڈے بال نوں چھیتی سِکھن وچ مدد دیوے گی۔
مینوں کاہدی لوڑ ہوئے گی؟
- اک پوٹی (یاں اک توں ودھ) اتے/یاں ٹوائلٹ جانا سکھاؤن والی سیٹ اتے نال اوہناں دے پیرا نوں آسرا دین لئی اک پوڈا۔ پوڈا اینا اُچا ہونا چاہیدا اے بئی جدوں ٹوائلٹ تے بیٹھا ہووے، تاں بال دے
- پتلون یاں مڑ کے ورتے جا سکن والے کپڑے دیاں سکھلائی والیاں پتلوناں۔
چوٹی دیاں صلاحواں
- باتھ روم وچ فرش تے کھلہار کے پوتڑے بدلو (جدوں تہاڈا بال آپنے آپ کھڑا ہون لگ پوے) تے اوہناں نوں اس عمل وچ نال رلاؤ (مثال دے طور تے، ٹٹی روڑھنا، ہتھ دھونا، پتلون تے پُل-اپ نوں ہیٹھاں لاہونا اتے مُڑ اُتانہہ کھچنا)۔
- باقاعدگی نال پوتڑے توں آزادی دا ویلا دیو۔ ایہہ کم اوہناں دے ہگن مُوتن توں بعد کرن دی کوشش کرو تاں جے اوہناں نوں پوتڑے توں آزادی دا احساس ہووے۔ اوہناں نوں صاف تے سُکا رکھن لئی ادھے گھنٹے بعد پوتڑا مُڑ کے بنھن وچ مدد دیو۔
- ہگن مُوتن بارے حقیقی ڈھنگ نال گل کرو۔
- غسل خانے نوں آپنے بال واسطے آرام دہ محسوس کرواؤ، اچیچا جے تہاڈے بال نوں حسی شیواں نوں سمجھن وچ مشکلاں نیں۔ مثال دے طور تے، جے تہاڈے بال نوں ٹوائلٹ فلش کرن دی کھپ بھیڑی لگدی اے، تے باتھ روم وچ کناں دے ڈیفنڈر ورتن دی کوشش کرو۔
- کجھ بال ٹوائلٹ دیاں بوآں توں حساس ہو سکدے نیں۔ باتھ روم وچ لیونڈر، پیپرمنٹ یاں اک ایئر فریشنر رکھن دی کوشش کرو۔
- بٹناں والے ٹراؤزراں (جیویں جینز)، یاں ٹائٹس والے سکرٹاں، جیہڑے باتھ روم جان ویلے لاہونے اوکھے ہوندے نیں، ایہو جہے کپڑے پاؤنا جیہڑے ہیٹھاں نوں کھچ کے لاہون وچ سوکھے ہون، (جیویں جوگر یاں لیگنگز)، بڑے ودھیا سُجھاء نیں! پوتڑے ورتنا چھڈن مگروں پہلے کجھ دیہاڑیاں لئی کجھ بال تیڑوں ننگے پھرنا پسند کردے نیں۔
پوتڑے چھڈنا
جدوں تُسیں تیاری کر لئی تے مشق کر لئی، ایہہ ویلا اے بئی دن ویلے پوتڑے بنھنا چھڈ دیو۔ اوہ ویلا چُنوں جیہڑا تہاڈے ٹبر لئی کم کردا ہووے، جدوں حیاتی واہوا سکون وچ ہووے، وڈیاں بدلیاں یاں لانجھیاں توں بغیر۔
جے تہاڈے بال نوں صحت دے ایہو جہے مسئلے نیں جیہڑے اوہدیاں آندراں اتے/یاں مثانے نوں متاثر کردے نیں، جیویں قبض یاں مثانے دی انفیکشن، تاں پوتڑیاں توں چُنڈ چھڈاؤن توں پہلاں ایہہ مسئلے حل کرو۔
آپنے بال نوں دسو بئی کیہ ہو رہیا اے
اوہناں نوں دسو بئی اوہناں دی جان پوتڑیاں توں چُھٹن لگی اے تے سمجھاؤ بئی پوٹی یاں ٹوائلٹ ورتن دا کیہ مطلب اے۔
ہن اوہناں نے پوتڑے چھڈ دتے نیں، اوہناں نشانیاں ول دھیان رکھو بئی اوہناں نوں پوٹی لئی جان دی لوڑ اے تے اوہناں دی رہنمائی کرو:
- اوہ تہانوں دسدے نیں بئی اوہ مُوتن لگے نیں یاں اوہناں نوں مُوتن دی لوڑ اے۔
- جدوں اوہ گِلے یاں گندے ہوندے نیں اوہناں نوں پتہ لگ جاندا اے تے اوہ تہانوں دسدے نیں۔
- بے چینی کرنا، چُپ ہو جانا، یاں کِھجنا (جیہڑا مُکھ تے کھچاء وانگوں نظر آ سکدا اے)۔
جدوں تُسیں کوئی نشانی ویکھو، اوہناں نوں پوٹی یاں ٹوائلٹ ول لے جاؤ تے اوہناں نوں کوشش کرن دی ہلاشیری دیو۔ آپنے بال نوں گھڑی گھڑی اشارہ کرن یاں ایہہ پُچھن توں ولاؤ بئی پوٹی آئی آ؟ مُوتن ویلے مُنڈیاں نوں ہلاشیری دیو بئی بیٹھ کے مُوتن اچیچا جدوں اوہ پوٹی کرنا سکھ رہے ہون۔ ایہہ اوہناں نوں بہتا آرام محسوس کرن وچ مدد کردا اے تے جے اوہناں نوں ٹٹی وی آئی اے، تے ایہہ اوہناں نوں ہگن دی ہلاشیری دیوے گا۔
جے تہاڈے بال نو٘ گل بات کرن وچ مدد دی لوڑ اے، تاں تُسیں Makaton علامتاں، تصویراں یاں ٹوائلٹ وغیرہ دیاں مورتاں ورت سکدے او۔ اوہ چُنو جیہڑی ایہہ پچھانن وچ تہاڈے بال دی مدد کرے بئی ایہہ پوٹی یاں ٹوائلٹ ورتن دا ویلا اے۔
بہت سارا سلاہو اتے ہلاشیری دیو!
ہر اُپرالے تے کامیابی دی خوشی مناؤ، بھاویں جِنی وی نِکی ہووے۔ پوٹی یاں ٹوائلٹ تے بیٹھن لئی آپنے بال نوں سلاہو - مُوتنا یاں ہگنا اک بونس اے!
نویں ہُنر سکھن وچ آپنے بال دی مدد کرو
آپنے بال نُوں بُنڈ پُونجھنا، ٹٹی روڑھنا، ہتھ دھونا، تے آپنی پتلون آپ چُننا سکھاؤ۔ ایہہ آپنے آپ تے بھروسہ اتے قابو ہون دا احساس پیدا کرن وچ مدد کردا اے۔ بال جس ویلے ریسپشن شروع کردے نیں اودوں تیکر اوہناں نوں بُنڈ پُونجھن جوگے ہونا چاہیدا اے۔
مستقل مزاج رہو
جدوں تہاڈا بال دِنے پتلون ورتنا شروع کر دیوے، تاں مستقل مزاج رہنا تہاڈے بال نوں چھیتی سکھن وچ مدد دیوے گا۔ ایہہ تہاڈے بال نوں الجھن وچ پا سکدا اے، مثال دے طور تے، باہر جان ویلے اوہناں نوں مُڑ کے پوتڑے ورتنے پیندے نیں۔
چوٹی دیاں صلاحواں
- پوتڑے توں پتلون تے آؤنا عجیب محسوس ہو سکدا اے۔ جے تہانوں لگے بئی تہاڈے بال نوں ایہہ بدلی اوکھی لگ سکدی اے تاں وکھو وکھ شکلاں، رنگاں، تانے اتے فِٹ دے چون رکھو۔
- جے تہاڈے بال نوں پوٹی تے بہتا چر بیٹھن وچ اوکھیائی ہووے، تاں رل کے اک گیت گاؤن یاں اک نکی جہی کتاب پڑھن دی کوشش کرو۔ گیت یاں کتاب مُکن تک اوہناں نو پوٹی یاں ٹوائلٹ تے رہن دی ہلاشیری دیو۔
- ٹٹی پیشاب نکل جاوے تے پُرسکون رہو: رل کے صفائی کرو، اوہناں نوں پیار نال پوٹی یاں ٹوائلٹ جانا یاد کرواؤ، تے اگانہہ ودھو۔ جدوں اوہناں دا ٹٹی پیشاب نکل جاوے تاں جے تُسیں ہفڑاتفڑی نہیں پاؤندے، تاں اوہ پریشانی تے فکرمندی محسوس نہیں کرن گے، تے اگلی واری کامیاب ہون دا امکان بہتا ہووے گا۔
- جدوں تُسیں باہر نکلو تے تیار رہو: جے تُسیں پہلے کجھ دیہاڑے گھر رہ سکدے او تاں تہانوں ایہہ سوکھا لگے گا، پر جدوں تُسیں باہر جاندے او، تاں بدلن لئی واہوا سارے کپڑے نال لے لؤ۔ تہانوں اک سفری پوٹی تے اک دھوتا جان والا، پانی چُوس کار سیٹ لائنر فیدے مند لگ سکدا اے۔
دپہرے سون ویلے اتے راتیں پوتڑے توں آزاد ہونا
جدوں تہاڈا بال دِنے پوتڑے ورتنا چھڈ دیوے، تاں ایہہ دپہرے سون ویلے بارے سوچن دا ویلا اے۔ دُپہرے سون ویلے پوتڑے توں بغیر رہن نال تہاڈے بال نوں راتیں سُکا رہن لئی تیار ہون وچ مدد ملے گی۔
دُپہرے سون توں پہلاں اتے مُڑ کے اُٹھن ویلے اوہناں نوں ٹوائلٹ یاں پوٹی ورتن دی ہلاشیری دین نال شروع کرو۔ جدوں تُسیں دیکھو بئی پوتڑا کہٹو کہٹ کجھ ویلے لئی سُکا رہن لگا اے، تاں دُپہرے سون ویلے پوتڑا بنھنا چھڈ دیو۔
جدوں بالاں نوں دِنے پوٹی ورتنا آ جاندا اے تاں اوہدے مگروں عام طور تے رات نوں اوہ سُکا رہنا شروع کر دیندے نیں۔ بہتے بال 5 ورھیاں دی عمر تیکر رات نوں سُکے ہوندے نیں پر کجھ نوں بہتا ویلا لگ سکدا اے۔
رات نوں سُکا رہن وچ آپنے بال دی مدد انج کرو:
- یقینی بنا کے بئی سون ویلے اوہ ٹوائلٹ یاں پوٹی ورتن، پہاویں اوہناں نے سون لگیاں پوتڑا بنھنا اے فیر وی۔
- سون توں اک گھنٹہ پہلاں پین والیاں شیواں دینا بند کر دیو۔
- سون دا اک پکا معمول بناؤ۔
- آپنے بال نوں سُتے نوں جگاؤن اتے اوہناں نوں ٹوائلٹ لے جان توں ولاؤ ایہدے نال اوہناں نوں نیندر وچ مُوتن لئی ہلاشیری ملدی اے۔
جے 5 ورھیاں دا ہون تیکر تہاڈا بچہ رات نوں سُکا نہیں رہندا تاں آپنے ہیلتھ وزیٹر، سکول نرس یاں محکمہ صحت دے سیانے نال گل کرو۔
میں مدد لئی کتھے جاواں؟
تُسیں آپنے کھڈاوے، نرسری، پری سکول ٹیم، ہیلتھ وزیٹر اتے بالاں دے مرکز یاں ٹبری مرکز توں مدد لے سکدے او۔
تُسیں آپنی ہیلتھ وزیٹنگ ٹیم نال ہون والی کسے وی گل بات وچکار پوٹی کرنا سکھاؤن بارے پُچھ سکدے او۔ تُسیں آس رکھ سکدے او بئی تہاڈی ہیلتھ وزیٹر تہاڈے بال دے 9 توں 12 مہینیاں دے صحت دے جائزے ویلے تہاڈے نال پوٹی کرنا سکھاؤن بارے گل بات کرے گی۔
سیانیاں دی بہت ساری صلاح دستیاب اے، سنے اوہناں ٹبراں لئی جیہناں دے بالاں دیاں SEND نیں۔
سارے فیدے مند لنکس، وسیلیاں اتے ERIC، The Children’s Bowel and Bladder Charity دے سیانیاں ولوں صلاحواں دی اک لسٹ واسطے ساڈا لاہے وند لنکس صفحہ دیکھو۔